Tensionet mes SHBA-së dhe Iranit vazhdojnë të rriten, por presidenti amerikan Donald Trump thotë se dy palët ende po zhvillojnë negociata dhe se Teherani po tregohet më i gatshëm për dialog.

Pavarësisht rritjes së tensioneve në Lindjen e Mesme dhe përplasjeve të vazhdueshme mes Shteteve të Bashkuara dhe Iranit, presidenti amerikan Donald Trump ka deklaruar se negociatat mes dy palëve po vazhdojnë dhe se pala iraniane po tregohet më serioze në dialog.

Duke folur për gazetarët në Shtëpinë e Bardhë, Trump tha se kontaktet me Teheranin janë ende aktive.

“Po bisedojmë me ta. Mendoj se po tregohen seriozë”, deklaroi Trump, duke iu referuar përfaqësuesve iranianë në negociata.

“Mendoj se janë shumë më seriozë se sa i kemi parë ndonjëherë më parë, por kjo nuk do të thotë se do të arrijmë një marrëveshje. Do të shohim se çfarë do të ndodhë”, tha ai.

Presidenti amerikan ka bërë disa herë deklarata se një marrëveshje mes Uashingtonit dhe Teheranit mund të jetë pranë, por përpjekjet diplomatike deri tani nuk kanë sjellë një rezultat konkret dhe tensionet ushtarake kanë vazhduar.

I pyetur nëse kishte marrë vendim për rifillimin e sulmeve të mëdha ndaj Iranit, Trump tha se një hap i tillë nuk ishte ndërmarrë.

“Jo, nuk kam marrë një vendim të tillë”, u përgjigj ai.

Megjithatë, ai theksoi se Shtetet e Bashkuara janë të gatshme për veprim nëse do të jetë e nevojshme.

“Jemi plotësisht të përgatitur dhe gati për të vepruar. Por, po bisedojmë me ta, kështu që mendoj se derisa po bisedojmë, do të shohim se çfarë do të dalë prej kësaj”, tha Trump.

Deklaratat e tij erdhën në një kohë kur përplasjet në rajon janë zgjeruar. Forcat amerikane kanë goditur objektiva në Iran, ndërsa më herët Trump kishte paralajmëruar për një “ndëshkim të madh ushtarak” pas vrasjes së tre ushtarakëve amerikanë në Jordani dhe humbjes së jetës së një tjetër në Irak.

Ndërkohë, Arabia Saudite ka ndërmarrë sulme ndaj pozicioneve të rebelëve Huthi në Jemen, grup i mbështetur nga Irani, pasi këta të fundit sulmuan anije saudite në Detin e Kuq.

Zëdhënësi i ushtrisë saudite, Turki al-Maliki, deklaroi se Huthit kishin shënjestruar anije tregtare në këtë zonë dhe se koalicioni kishte reaguar me një operacion ushtarak.

“Organizata terroriste ushtarake Huthi… shënjestroi anije tregtare në Detin e Kuq”, shkroi al-Maliki në platformën X.

Ai shtoi se koalicioni kishte ndërmarrë “një përgjigje vendimtare dhe të fuqishme” ndaj objektivave që përdoreshin për të kërcënuar sigurinë e lundrimit.

Pas sulmeve, rebelët Huthi pretenduan se kishin lëshuar një raketë drejt qytetit saudit Jizan, ndërsa autoritetet saudite aktivizuan paralajmërimet për banorët.

Pakistani dënoi sulmet ndaj anijeve saudite dhe paralajmëroi se çdo kërcënim ndaj anijeve me flamur pakistanez ose interesave detare të vendit do të konsiderohej një rrezik serioz.

Islamabadi, i cili ka luajtur rol ndërmjetësues mes SHBA-së dhe Iranit dhe mban lidhje të afërta me Arabinë Saudite, deklaroi se një agresion ndaj interesave të tij mund të çojë në përdorimin e forcës.

Me përhapjen e përplasjeve nga Irani në Jemen dhe Detin e Kuq, shqetësimet ndërkombëtare janë rritur se konflikti mund të shndërrohet në një përballje më të gjerë rajonale.